అంతరంగ తరంగాలు

వంశపారంపర్యంగా అనుభవించే శాపాలుంటాయా

2011-07-04T20:25:00.001+05:30

కొన్ని శాపాలు వంశపారంపర్యంగా అనుభవిస్తారంటారు. అలాంటివున్నాయా అంటే వున్నాయనే శాస్త్రాలు చెబుతున్నాయి. ఏడు తరాలవరకూ ఆ శాపాలననుభవిస్తారుట. అవేమిటంటే దేవ శాపం, సర్ప శాపం, ఋషి శాపం, మాతృ శాపం, పితృ శాపం. వీటిని వంశానుక్రమంగా కొన్ని తరాలవారు అనుభవించాలి.

సర్ప శాపం ఎలా వస్తుందంటే కొందరు నాగుపాములను చంపుతుంటారు. నాగు పాములను చంపకూడదు. కొందరు పుట్టలు తొలిగించి ఇళ్ళుకట్టటం వగైరా చేస్తారు. తెలిసీ, తెలియక పుట్టల సమీపంలో మూత్ర విసర్జన చేసినా, ఋతు సమయంలోని మైల బట్టలు పాములు దాటినా ఈ శాపాలు ప్రాప్తిస్తాయి.

ఋషి ఋణం ..ఋషులు, సిధ్ధులు లోక క్షేమంకోసం తపస్సు చేసే మహా పురుషులు అనేకులుంటారు. వారికి ఎటువంటి హాని తెలిసిగానీ తెలియకగానీ కలిగించినా ఋషిశాపగ్రస్తులవుతారు.

దేవశాపం .. గుడికి ఏ విధమైన హాని తలపెట్టినా, ఆలయంలోని వస్తువులనుగానీ ధనాన్నిగానీ అపహరించినా దైవశాపం తప్పదు.

మాతృ శాపం చిన్న విషయంకాదు. తల్లి ఎల్లప్పుడూ శిశువు క్షేమంకోసం తపిస్తూంటుంది. అలాంటి తల్లి తన బిడ్డలు తనపట్ల ఏ ద్రోహం చేసినా శపించదు. ఏ వయసులోనైనా తలిలిదండ్రులను గౌరవించాలి. కొందరు తల్లిదండ్రులను సరిగ్గ చూడరు. తమ సర్వస్వాన్నీ త్యాగంచేసి పిల్లలని వృధ్ధిలోకి తీసుకు వస్తే వారి వృధ్ధాప్యంలో వారి ఆస్తులను తీసుకుని వారిని బయటకు వెళ్ళగొట్టే బిడ్డలూ వున్నారు. ఏ సందర్భంలోనూ తల్లిదండ్రులు పిల్లలని తిట్టరు. వారికి అవసరమైనప్పుడు చేయూతనివ్వకపోతే వారి ఆవేదన వీరికి శాపమవుతుంది. బాధాతప్త హృదయంతో వాళ్ళు పెట్టుకునే కన్నీళ్ళు, పిల్లలను తిట్టకపోయినా, పిల్లలపాలిటి శాపాలవుతాయి. పితృ శాపం కూడా ఇంతే. పిల్లలు తల్లిదండ్రులను ఏ సమయంలోనూ కష్టపెట్టకూడదు. తల్లిదండ్రులు కూడా తాము సత్ఫ్రవర్తనాపరులై, పిల్లలకుకూడా చిన్నప్పటినుంచే సత్ప్రవర్తన నేర్పాలి.

పై దోషాలవల్ల వచ్చే శాపాలు ఏడుతరాలవారు అనుభవిస్తారంటారు.

(జీ తెలుగు ప్రసారం చేసిన గోపురం ఆధారంగా)

కొంటె కోణాలు - 14

2011-07-01T16:24:00.004+05:30

హమ్మయ్య! శాపం పెట్టేశాను!!

ఈ పోటీ ప్రపంచంలో ప్రకటనలకున్న ప్రాముఖ్యం తెలియనివాళ్ళుండరుకదా. రోడ్లమీద, టీవీలలో, ఫోన్లల్లో ఎక్కడబడితేఅక్కడే ఈ ప్రకటనల హోరు తప్పించుకోవటానికి సామాన్య మానవుడు పడే ఇబ్బంది కూడా సామాన్యులమయినమనందరికీ తెలిసిందే.

అయితే ఈటీవీ అంతఃపురం సీరియల్ లో ప్రముఖ ఆడ దుష్టపాత్ర మృణాళినికి కూడా ఈ ప్రకటనల హోరు తప్పలేదు. పైగా ఇలాంటి దుష్టులనెదుర్కోవటానికి మామూలువాళ్ళు పనికిరారని ఈటీవీవారు ప్రముఖ సినీ గాయకుడుయస్.పీ.బాల సుబ్రహ్మణ్యం గారినే తీసుకొచ్చేశారు ఆవిడని ప్రకటనలతో హోరెత్తించటానికి… యస్.పీ.బాలసుబ్రహ్మణ్యంగారు ఈ అవతారం కూడా ఎత్తారా? ఎలగెలగెలాగంటారా?? చెబుతున్నానుగా……

1-7-2011 ఈటీవీ లో పగలు 3-00 గం. లనుంచీ 3-30 దాకా వచ్చే అంతఃపురం సీరియల్ చూసినవాళ్ళు గమనించేవుంటారు. మృణాళిని కాబోయే కోడలు రూపతో కలిసి జమీందారుని మాటలతో చిత్రవధ చేస్తున్న సమయంలో ఫోన్మోగుతుంది. ఆవిడ ఫోన్ ఎత్తగానే మాట్లాడిందెవరో తెలుసా!!??

టీవీవాళ్ళు యాదృఛ్ఛకంగా ఆవిడ ఫోన్ ఎత్తగానే వాణిజ్య ప్రకటనలకోసం సీరియల్ ఆపి నాకీ కొంటెకోణానికి అవకాశంఇచ్చారు. ఆవిడ ఫోన్ ఎత్తగానే తెరమీద శ్రీ యస్.పీ. బాలసుబ్రహ్మణ్యంగారు ప్రత్యక్షమయి .. “ పాడుతా తీయగా కొత్తస్వరాలకు స్వాగతం .. మీ వయసు 16 నుంచీ 24 మధ్యనా అయితే ఈటీవీ కల్పిస్తోంది మీకు సువర్ణావకాశం” .. అంటూమొదలెట్టారండీ.

ఇప్పుడు నవ్వక పోయినా ఈమారు అలాంటివి చూస్తే ఈ కొంటెకోణమే గుర్తొస్తుందిలెండి మీకు. ఇది నా శాపం.

గోపురంలో పొరబాటా?

2011-06-10T14:01:00.002+05:30

9-6-2011 ఉదయం జీ తెలుగు ప్రసారం చేసిన గోపురం కార్యక్రమంలో చిన్న పొరబాటు దొర్లింది. పొరబాట్లు ఎవరికైనా సహజం..దానినంత ఎత్తి చూపించాలా అనంటారా? వాళ్ళకన్నా నాకేదో బ్రహ్మాండంగా తెలుసనో, లేక వాళ్ళ తప్పుని ఎత్తి చూపించే అత్యుత్సాహంతోనో నేనిది రాయటంలేదు.

ఈ మధ్య టీవీలోవచ్చే ఇలాంటి కార్యక్రమాలపట్ల యువత చాలా ఉత్సాహం చూపిస్తోంది. చదువుకునే సమయంలో ఇలాంటివి నేర్చుకునే సమయం దొరకక మన సంస్కృతికి దూరమైనవారు, ఉద్యోగాలలో స్ధిరపడి దూరప్రాంతాలలో వుండి స్వదేశం, మన సంస్కృతివైపు మొగ్గుచూపుతూ ఈ మాధ్యమాలద్వారా అనేక విషయాలు తెలుసుకుంటున్నారు. దానికి ఉదాహరణ నా ఈ బ్లాగే. గోపురంలో నేను విని, నాకు నచ్చిన విశేషాలను పోస్టు చేస్తే దానికి స్పందన చాలా బాగుంటున్నది. అలాంటివారికోసమే ఈ తప్పు సవరించి నాకు తెలిసిన విషయం చెబుతున్నాను. వారు సరైన విషయం తెలుసుకోవాలనే అభిలాషతో మాత్రమే.

నిన్న కార్యక్రమంలో భగవంతునికి వస్త్రాలు సమర్పించే విషయంగురించి చెబుతూ, పూజలో భగవంతునికి నూతన వస్త్రాలు సమర్పించటానికి అవకాశం లేనప్పుడు పత్తితో చేసిన వస్త్రయుగ్మం సమర్పిస్తారని చెబుతూ, దానిని పత్తితో పొడుగుగా చేస్తూ మధ్య మధ్యలో గంధం, పసుపులతో పత్తిని నలిపి సన్నగా చేస్తారని చెప్పారు. నాకు తెలిసి దానిని యజ్ఞోపవీతమనీ, కొందరు, కంఠాభరణమనీ అంటారు. వస్త్రాలంటే పత్తితో గుండ్రంగా చేసి గంధం, కుంకుమ అద్దుతారు. వీటిని భగవంతునికి రెండు సమర్పిస్తారు. వస్త్రం ఒక్కటి ఇవ్వకూడదు. వస్త్రయుగ్మం సమర్పించాలి.

ఈ విషయంలో నాది పొరబాటయితే విజ్ఞులు సవరించాలని కోరుతున్నాను.

పిల్లల పేరుమీద పూజ చెయ్యకూడదా?

2011-05-10T16:02:00.002+05:30

12 సంవత్సరములలోపు పిల్లలకి తల్లి దోషాలే వారికీ వర్తిస్తాయి. కనుక భగవదనుగ్రహం కోసం పూజలు చేసేటప్పుడు సంకల్పంలో వారి యజమాని అయిన తండ్రి పేరు, గోత్రం వగైరా చెప్పి, సకుటుంబస్య అంటే సరిపోతుంది, అందరి పేర్లూ ప్రత్యేకించి చెప్పక్కరలేదు అంటారు కొందరు.

కానీ ప్రత్యేక సందర్భాలలో, పిల్లల పేర్లమీద కూడా పూజలు చెయ్యవలసి వస్తుంది. 12 సంవత్సరముల వరకూ తల్లిదండ్రుల దోషాలే వాళ్ళకీ వర్తిస్తాయనటం సరైనది కాదు. కొందరు పిల్లలు తరచూ అనారాగ్యంపాలుకావచ్చు, కొందరు సరిగ్గా చదవలేకపోవచ్చు, కొందరికి చదివింది జ్ఞాపకం వుండకపోవచ్చు, కొందరికి మాటలు సరిగ్గా రాకపోవచ్చు, కొందరికి బాలారిష్టాలు, రకరకాల సమస్యలు, మరణంతో సమానమైన అవస్తలు, గండాలు, అపమృత్యు దోషాలు వుండచ్చు. ఇలాంటి ప్రత్యేక సందర్భాల దోష నివారణార్ధం జరిగే ప్రత్యేక పూజలు ఎవరికోసం జరుగుతూంటే వారి పేరుమీదే చెయ్యాలి.. వారు పసి పిల్లలయినా సరే.

పిల్లలకి ప్రతి నిత్యం దైవ ప్రార్ధన అలవాటు చెయ్యాలి. నిద్ర లేవగానే, స్నానం చెయ్యగానే, బయటకు వెళ్ళేటప్పుడు, దైవ ప్రార్ధన అలవాటు చేస్తే, వయసుతోబాటు దైవ భక్తి, నిశ్చల తత్వం అలవడి పెద్దవారవుతున్నకొద్దీ ఏమైనా సమస్యలు ఎదురైనా భయపడక ధైర్యంగా ఎదుర్కోవటం నేర్చుకుంటారు.

ప్రత్యేక సమస్యల నివారణకోసం చేసే పూజలు ఎవరికోసం చేస్తుంటే వారి పేరుమీదే చెయ్యాలి. కొంచెం పెద్ద పిల్లలు స్వయంగా చేసుకోగలిగినవి వారిచేత చేయించవచ్చు, లేకపోతే వారి తరఫున పెద్దలు వారి పేరుమీద చెయ్యవచ్చు.

(జీ తెలుగు ప్రసారం చేసిన గోపురం ఆధారంగా)

కొంటె కోణాలు – 13

2011-05-02T08:19:00.002+05:30

కడపా? కపడా!??

ఇవాళ కడప పేరును మార్చారు మీకు తెలుసా? అధికారికంగా కాదులెండి..యన్టీవీ వారు మాత్రమే ఈ పని చేసినట్లు కనబడుతోంది. 2-5-11 ఉదయం లైవ్ షో విత్ కేయస్ఆర్ కార్యక్రమంలో కింద స్క్రోలింగ్ లో కడపని కపడ గా మార్చారు.

ఇలాంటివి ఈ మధ్య టీవీ స్క్రోలింగ్స్ లో సామాన్యమయిపోయినయి. తెలుగు సరిగ్గా రానివాళ్ళివి చూసి, .. చూసీ, చూసీ, తెలుగు బాగా వచ్చినవాళ్ళుకూడా ఈ తెలుగే సరియైనదని అనుకునే అవకాశం వుంది. సామెత వూరికే రాలేదుకదండీ .. తినగ తినగ వేము తియ్యగనుండు అని… అందుకే తెలుగు భాషాభిమానులు ఎవరైనా పూనుకుని టీవీ ఛానల్స్ వాళ్ళకి సరైన తెలుగు నేర్పేస్తే పోలా!!

అయినా బడాయికాకపోతే స్క్రోలింగ్ ఎంత హడావిడిలో రాసినా వెంటనే ఒకసారి చూసుకుంటే రాసినవారికి సమయం లేకపోతే .. పోనీ, ఇంకొకరెవరైనా వెంటనే చదివితే వారికీ సమయం ఆదా అవుతుంది, సదరు తెలుగు ఛానల్స్ సరైన తెలుగు ప్రసారం చేయగలుగుతారు.. కదా!? ..

బర్త్ డే గిఫ్ట్ - వరల్డ్ కప్

2011-04-03T19:39:00.028+05:30

బర్త్ డే గిఫ్ట్ - వరల్డ్ కప్

ఏప్రిల్ 2 మాకూ, మా అబ్బాయి తేజస్వికీ ఒక విశేషమైన రోజు. ఆ రోజు వాడి పుట్టిన రోజు మరి. సరే పుట్టిన రోజంటే కుటుంబ సభ్యులతో, స్నేహితులతో సరదాలూ, సందళ్ళూ మామూలే. ఈ మారు పుట్టిన రోజుమాత్రం ఎన్నడూ మరచిపోలేని రోజు. భారత క్రికెట్ జట్టు వరల్డ్ కప్ సాధించిన రోజు.

అసలింతకీ మాకందరీకీ కూడా మరచిపోలేని రోజెలాగయిందో చెప్పద్దూ.

మా అమ్మాయి దీప్తి వెకేషన్ కి వచ్చింది ఏప్రిల్ 1 వ తారీకున (ఈ విషయంలో మిమ్మల్ని ఏప్రిల్ ఫూల్ చెయ్యనుగా..నిజంగానే). వచ్చిన రోజే అక్కగారినీ(మమ్మల్నికూడాననుకోండి) వెంట పెట్టుకునెళ్ళి మా అబ్బాయి బైక్ కొనుక్కున్నాడు…బజాజ్ ఎవెంజర్. పుట్టిన రోజున వాడికి వాడు ఇచ్చుకున్న కానుక అది.

అర్ధరాత్రి 12 గం. లనుంచీ బర్త్ డే సెలబ్రేషన్స్ మొదలు. ఈ యూత్ కి మిడ్ నైట్ సెలబ్రేషన్సూ, బిర్యానీలు ఫ్యాషనయిపోయాయికదండీ. అందుకే అర్ధరాత్రి 12 గం.లకు కేక్ కటింగూ, ముఖానికి పూయింగూ. మంచి కేక్ నలా ముఖానికి పూసి వేస్ట్ చేస్తుంటే నాలాంటి వాళ్లకి బాధ. మళ్ళీ యూత్. ఏమీ అనకూడదు.

సరే ఆ బర్త్ డే సెలబ్రేషన్స్ మర్నాటికీ కంటిన్యూ అయ్యాయి. ఫ్రెండ్సూ, పార్టీలు ఇవ్వి మామూలే. ఇక్కడ మళ్ళీ యూత్ క్రేజీ సెలబ్రేషన్ ఎవరు కనిపెట్టారోగానీ..బర్త్ డే బాయ్ ని మోస్తూ తన్నుతారు. ఇదేం సరదానమ్మా విడ్డూరం కాకపోతే.

ఈ హడావిళ్ళమధ్య మొదలయింది అసలు హడావిడి. క్రికెట్ వరల్డ్ కప్ టోర్నమెంట్ లో ఫైనల్ మ్యాచ్ .. ఇండియా-శ్రీలంక మధ్య. ఇండియా ఫైనల్ కొచ్చేసరికి ఇండియాలో అందరికీ తెగ ఉత్సాహం వచ్చేసి వాళ్ళని తెగ సపోర్టు చెయ్యటం మొదలెట్టారు. స్పోర్టివ్ స్పిరిట్ తో దేశం తరఫున ఆడే ఒక టీమ్ కి ఇలా సపోర్టు చెయ్యటం బాగుంది..అందరూ ఉత్సాహం పుంజుకునేలా వుంది. వీళ్ళందరూ కలిసి జెండాలు తీసుకుని రోడ్లన్నీ తిరిగారు..ఇండియా..ఇండియా అని అరుచుకుంటూ.

మేచ్ మొదలయింది. కమాన్ ఇండియా యూ కెన్ డూ ఇట్ అరుపులతో ఇల్లు దద్దరిల్లింది.

ఇది కూడా బాగానే వుంది. ఇలాగన్నా యూత్ కి పాజిటివ్ సజెషన్స్ అలవాటవుతాయి అనుకున్నా. మధ్యలో ఆట శ్రీలంక వైపెళ్తోందా అనే అనుమానం..కొంత నిరుత్సాహం..ఆందోళనా..ఈ ఆందోళన మరచిపోదామని మా అమ్మాయి ఎటన్నా వెళదామనటం..పాపం..అది చాలా నిరుత్సాహ పడింది. ఈ ఆటకోసమే అంత దూరంనుంచి రాకపోయినా, అవకాశాన్ని సద్వినియోగం చేసుకుందామని..అందరితో ఉత్సాహంగా ఆట చూద్దామని ఆశ పడ్డది. ఇంతలో మళ్ళీ మార్పులు..క్షణ క్షణం ఉద్వేగ భరితం..అరుపులు, కేరింతలతో ఈ మారు మా కాలనీనే మారు మోగించారు మా వాళ్ళు.

మొత్తానికి ఇండియా గెలిచింది.

అప్పుడెప్పుడో మావాడు పుట్టకముందు ఇండియా ఒకసారి వరల్డ్ కప్ గెలిచింది. మళ్ళీ ఇన్నాళ్ళకి..అదీ వాడి బర్త్ డే న. వాడి ఫ్రెండ్సంతా నీ బర్త్ డే గిఫ్ట్ వరల్డ్ కప్ రా అంటూహుషారు చేశారు. అంతా కలిసి అర్జంటుగా టాంక్ బండ్ కి పరిగెత్తారు.

అందుకని ఈ రోజు మరచిపోలేము..పదిహేనుమందిమి కలసి హోరెక్కిస్తూ గేమ్ చూడటంకూడా మేమిదే మొదటిసారి..అందుకని మాకు మరచిపోలేని రోజు. మావాడి ఫ్రెండ్స్..ప్రీతి, శరత్ లు అమెరికాలో వుంటారు. మొన్న మార్చి 20 వ తారీకున వాళ్ళ పెళ్ళయింది. వాళ్ళు కూడా మాతో కలిశారు. వాళ్ళుకూడా అంత దూరంనుంచి వచ్చిందెందుకు ఇండియాని గెలిపించటానికే..ఇండియా..ఇండియా అంటూ చాలా సరదాగా గడిపి వెళ్ళేటప్పుడు ప్రీతి చెప్పింది..ఇండియాని ఇంత సపోర్టు చేసి గెలిపించాం ఆంటీ..ఇవాళ మరచిపోలేము అని.

నాకొకటిమాత్రం బాగా నచ్చింది..ఈ యూనిటీ అన్ని విషయాల్లో చూపిస్తే..ఈ ఆట మీద చూపించిన శ్రధ్ధ మనమీద, మన చుట్టుపక్కలవారిమీద, మన దేశం మీద చూపిస్తే ఇండియాని మించిన దేశం వుంటుందా!!??

దేవాలయంలో ఇంకెవరికీ నమస్కరించకూడదా?

2011-03-31T16:14:00.003+05:30

దేవాలయంలో దైవ దర్శనానికి కూడా కొన్ని పధ్ధతులున్నాయి. వరుసగా గణపతి, ఉపాలయాలు, తర్వాత ప్రధాన దైవాలు. ప్రధాన దైవ దర్శనం తర్వాత, ఆ దైవాన్ని పూజించిన తర్వాత ఆ దైవానికన్నా శక్తివంతులు ఆ ఆలయంలో ఇంకెవరూ దర్శనీయులుగానీ, పూజనీయులుగానీ వుండరు. అందుకనే ఆ దైవంముందు ఇంకెవరికీ నమస్కరించకూడదు. కొందరు, పరిచయస్తులకీ, ప్రముఖులకీ, దేవాలయాల్లోకూడా నమస్కరిస్తారు. దైవం కన్నా అంతా అన్నివిధాలా చిన్నవారే. అందుకనే దైవం ముందు మానవులకు నమస్కరించటం ఇరువురికీ మంచిదికాదు. మరి ఎలాగండీ తెలిసినవారు కనిపిస్తే పలకరించవద్దా అంటారా? పలకరింపులకు అనేక మార్గాలున్నాయి…చేతులు జోడించి నమస్కారమే అక్కరలేదు.

కొందరు అక్కడవున్న అర్చకులపాదాలకు నమస్కరిస్తారు. అదికూడా మంచి పధ్ధతికాదు. నమస్కరించినవారు దైవంకన్నామానవులకు ఎక్కువ గౌరవాన్నిచ్చినట్లు..అలా చేయటంవల్ల వారికి పాపం. నమస్కారం అందుకున్నవారుకూడా దైవంకన్నా తాము అధికులమని అహంకరించినట్లు..వారికీ మంచిది కాదు. తప్పనిసరి పరిస్ధితుల్లో ఎవరికైనా నమస్కరించాల్సివస్తే అక్కడవున్న దైవం పేరు చెప్పి నమస్కరించాలి. అంటే ఆ నమస్కారం ఆ దైవానికే చెందుతుంది.

ఆలయాల్లోనేకాదు, కొన్ని ప్రధాన ఆలయాలున్న కొండలమీదకూడా…అంటే తిరుపతి, శ్రీశైలం లాంటి ఆధ్యాత్మికంగా మహోన్నతమైన ఆలయాలున్న కొండలమీద ఆ ఆలయాల్లోనే కాదు, ఆ కొండలమీదకూడా ఎవరికీ నమస్కరించకూడదు. అవసరమైనప్పుడు మార్గం వుందికదా..అక్కడి దైవం పేరుచెప్పి నమస్కరించాలి..అంటే వారిలోకూడా ఆ స్వామినే చూసి ఆ స్వామికి నమస్కరించినట్లు.

(జీ తెలుగు ప్రసారం చేసిన గోపురం ఆధారంగా)

దేవాలయానికి తప్పనిసరిగా వెళ్ళాలా?

2011-03-24T15:45:00.003+05:30

చాలామందికి దేవాలయానికి వెళ్ళాలంటే అదో పెద్ద పనిష్ మెంట్ కింద అనుకుంటారు. మనసులో దేవుడంటే భక్తి వున్నా, నమ్మకం వున్నా, దేవాలయానికి వెళ్ళటమంటే అదో పెద్ద పనిగా బధ్ధకిస్తారు. పైగా దేవుడు మనలోనే వున్నాడు, మనింట్లోనూ వున్నాడు, ఎక్కడపడితే అక్కడ వున్నాడు..మళ్ళీ గుడిదాకా వెళ్ళి ఆయన దర్శనం చేసుకోవాలా అని వాదిస్తారు. అలాంటివారికి ఒక్కటే సమాధానం. దేవాలయానికి వెళ్ళటంవల్ల అనేక ఉపయోగాలు వున్నాయి. అందుకని తప్పనిసరిగా వెళ్ళాలి. మీకు ఆలయాలంటే ఇంటరెస్టు ఎక్కువ, అందుకే అలా చెబుతారంటున్నారా? నాకే కాదు దేవాలయానికి వెళ్ళటంవల్ల వెళ్ళిన ప్రతి ఒక్కళ్ళకీ వచ్చే లాభాలేమిటో చెబుతాను.

దేవాలయాలలో విగ్రహ ప్రతిష్ట సమయంలో కొన్ని యంత్రాలనుకూడా స్ధాపిస్తారు. వాటికీ, రోజూ పూజలందుకునే భగవంతుడికీ కొంత శక్తి వుంటుంది. మనం దైవ దర్శనం చేసుకున్నప్పుడు ఆ శక్తి మనకందుతుంది. (బయటకొచ్చి కండలు చూసుకోకండి ఎంత పెరిగాయో ఆ శక్తితో అని..). ఇంక అభయముద్రతో వున్న దైవ స్వరూపాన్ని చూసేసరికి మానసిక ప్రశాంతత ఏర్పడి, మన జీవిత బాటలో మనల్ని ఆదుకునేవారున్నారు అనే నమ్మకం, తద్వారా మనో బలం లభిస్తాయి. ఆధ్యాత్మకి ప్రశాంతత లభిస్తుంది. ఆలయంలో పైన వుండే కలశంద్వారా ప్రాణ శక్తి ఆ ఆవరణనీ, అందులోకి వెళ్ళినవారినీ ఉత్తేజ భరితుల్ని చేస్తుంది. ఈ విధంగా రకరకాల శక్తుల ప్రభావం అక్కడికెళ్ళినవారిమీద పడటంతో వారిలోని అనేక పాపాలు, దోషాలు పరిహరింపబడతాయి.

కొత్త ప్రదేశాలలో ఆలయాలకి వెళ్ళినప్పుడు అక్కడ చారిత్రాత్మక విషయాలు, పురాణగాధలు, అంతకుముందు అక్కడ నివసించిన మహనీయులు, అక్కడివారి ఆచార వ్యవహారాలు, శిల్ప కళలో వైవిధ్యాలు, ఇలా ఎన్నో విషయాలు తెలుసుకోవచ్చు. ఇంట్లోనే వుంటే కూపస్ధ మండూకంలా ఒక పరిధిలోనే వుంటాయి మన ఆలోచనలు వగైరా.

ఇలా, ఏ విధంగా చూసినా ఆలయ దర్శనం వల్ల ఎవరికైనా ఉపయోగమే.

మనలో మాట

కొస మెరుపు

చిన్న చిన్న నష్టాలు కూడా వుంటాయండీ. మా ఆయన చెప్పులు నాలుగు సార్లు, మా చెల్లెలువి ఒకసారి పోయినయ్యి ఇప్పటిదాకా.

(ఆధారం..జీ తెలుగు ప్రసారం చేసిన గోపురం)

కొంటె కోణాలు – 12

2011-03-20T16:13:00.005+05:30

స్క్రోలింగ్ మిక్స్

కొంటె కోణాలు లో జోక్స్ చెప్పి చాలా కాలమైంది కదా. ఈ మధ్య టీవీ సీరియల్స్ లో, ఏడుపులు కక్ష సాధించటాలు తప్పితే ఏమీ లేవు. న్యూస్ చూద్దామంటే ఏ ఛానల్ చూసినా నలుగురయిదుగురు కలిసి ఒకేసారి మాట్లాడుతున్నారాయె. న్యూస్ ఛానల్స్ చూసీ చూసీ ఈ మధ్య నా కో కొత్త జబ్బు పట్టుకుంది. ఎదుటివాళ్లు మాట్లాడింది నాకర్ధంకావాలంటే నలుగురయిదుగురు ఒకేసారి మాట్లాడాలి. పాపం మావారు ప్రతిసారీ నలుగురిని పట్టుకురాలేక ఇంట్లో న్యూస్ ఛానల్ చూడకూడదు అని ఆంక్షకూడా పెట్టారు.

న్యూస్ చూసి చాలా రోజులయిందండీ..ఒక్కయిదు నిముషాలు చూస్తానని ఆయన్ని బతిమాలి ఇవాళ పొద్దున్న 9-55 కి NTV పెట్టానండీ. నాలుగో నిముషం మీకు చెప్పటానికో కొంటె కోణం దొరికింది….

ఆ సమయంలో, ఆ ఛానల్ లో స్క్రోలింగ్ ఏమొచ్చిందో చూసి నవ్వొస్తే హాయిగా నవ్వేసెయ్యండి…

ఆంధ్ర ప్రదేశ్ లో నేను చేబట్టిన యాత్ర .. రామ్ దేవ్ (యాత్ర తరువాత ఏమిటో పూర్తి చెయ్యలేదు. వెంటనే వచ్చినది) …బెట్టింగ్ మేళా

కోపంనుంచి బయటపడటం ఎలా?

2011-03-17T16:41:00.002+05:30

మనిషన్న ప్రతివాడికీ కోపం వస్తుందండీ. అయితే కొందరికి చిన్న విషయాలకికూడా చాలా తీవ్ర స్ధాయిలో, కొందరయితే వారిని వారే మర్చిపోతారు. అపరిమితమైన కోపంతో బి.పీ. పెరిగిపోతుంది. దానితో కొందరు చేతికందిన వస్తువులు విసిరేస్తూవుంటారు. కోపంతో వూగి పోతున్నవాళ్ళని గమనించండి. వాళ్ళు ఏ పనీ చెయ్యలేరు. బుఱ్ఱ పని చెయ్యదు. సరైన ఆలోచనలు రావు. వాళ్ళ ఆలోచనలను వాళ్ళు కంట్రోల్ చేసుకోలేరు. ఎదుటివాళ్ళని కొడదామని, ఒక్కొక్కసారి చంపుదామనికూడా అనుకోవటం కద్దు.

నిజమే. ఎదుటివాళ్ళమూలంగా మనం నష్టపోయినప్పుడే మనకంత కోపం వస్తుంది. వాళ్ళమూలంగా మనకి నష్టంగానీ, బాధగానీ కలిగివుండచ్చు. కానీ కోపంతో వూగిపోతే మనకి మనంకూడా నష్టం చేసుకుంటున్నాము. విపరీతమైన కోపంవల్ల అనేక రోగాలు బయటకొస్తాయి. బి.పీ. పెరుగుతుంది, కళ్ళు దెబ్బతింటాయి, కొందరికి హార్ట్ ఎటాక్ రావచ్చు.

అయితే ఈ కోపాన్ని ఎలా అధిగమించాలి. మొట్టమొదట చేయాల్సినపని మౌనం వహించాలి. కొంచెం సేపు ఏమీ మాట్లాడకుండావుంటే ఆవేశం తగ్గుతుంది. తర్వాత ఎదుటివారికి వారి తప్పు నెమ్మదిగా, వారికి అర్ధమయ్యేటట్లు సున్నితంగా చెప్పవచ్చు. చల్లని నీరు తాగి కొంచెం సేపు శ్రీరాముణ్ణి తలుచుకుని ఆయనకి నమస్కరించాలి. శ్రీరాముడు శాంత స్వరూపుడు. ఆయనని తల్చుకుంటే కోపం తగ్గిపోతుంది. శతృ ద్వేషం తగ్గుతుంది. మన ఆరోగ్యం బాగుండాలంటే కోపాన్ని అదుపులో పెట్టుకోవాలి.

(జీ తెలుగు ప్రసారం చేసిన గోపురం ఆధారంగా)

ఇంట్లో దేవుడి విగ్రహాలను ఏ విధంగా కడగాలి?

2011-03-12T10:49:00.002+05:30

చాలామంది దేవుడి విగ్రహాలను ఇంట్లో పాత్రలు శుభ్రపరచుకునే సబ్బుతోనో, డిటర్జెంట్ పౌడర్ తోనో తోముతుంటారు. నిత్యం అభిషేకం చేసేవాటిని తోమక్కరలేకపోయినా, వెండి, రాగి మొదలగు కొన్ని లోహాలు తేమ గాలికి నల్లబడి, మెరుపు తగ్గుతాయి. అందుకని వాటిని తోమి శుభ్రపరచటం అవసరం.

అయితే విగ్రహాలకు మనం ప్రాణ ప్రతిష్టచేసి, అర్చన చేసి, నైవేద్యం పెడతాం. భగవంతుని శక్తి వాటిలో వుంటుంది. మరి వాటిని ఎలా పడితే అలా తోమెయ్యకూడదుకదా. మరెలా చెయ్యాలంటే ఆలయాల దగ్గర విభూతి వుండలు అమ్ముతూ వుంటారు. అవి తెచ్చి వాటితో వెండి విగ్రహాలను అతి సున్నితంగా పసి పిల్లలకు స్నానం చేయిస్తున్నట్లు జాగ్రత్తగా తోమాలి. అలాగే రాగివాటిని శనగపిండిలో పెరుగు వేసి దానితో తోమాలి. చింతపండు, నిమ్మకాయ వాడితే మరు రోజుకి నల్లబడతాయి. దేవుళ్ళ విగ్రహాలను సబ్బులు, యాసిడ్లు, డిటర్జంట్లతోకాకుండా పైన చెప్పిన విధంగా పసి పిల్లలకి స్నానం చేయిస్తున్నంత సున్నితంగా శుభ్రం చెయ్యాలి. అవి భగవత్ స్వరూపాలు మరి.

(జీ తెలుగు ప్రసారం చేసిన గోపురం ఆధారంగా)

పూజలో ఎలాంటి విగ్రహాలు పెట్టుకోకూడదు?

2011-03-10T19:11:00.001+05:30

అనేక రకాల లోహాలతో తయారుచేసిన విగ్రహాలు చూస్తూవుంటాము. వాటిలో వేటిని పూజలో పెట్టుకోవచ్చు, వేటిని పూజించకూడదు అని కొన్ని సందేహాలొస్తూ వుంటాయి. బంగారం, వెండి, ఇత్తడి, కంచు లోహాలతో తయారయిన విగ్రహాలను పూజలో పెట్టవచ్చు. అయితే ఈ విగ్రహాలు చిన్నవిగా వుండాలి. రాగితో తయారు చేసినది కేవలం గణపతి విగ్రహాన్ని మాత్రమే పూజించవచ్చు. స్ఫటిక విగ్రహాలు విశేష ఫలితాన్నిస్తాయికానీ అవి పగలకుండా చాలా జాగ్రత్త వహించాలి.

అందంగా వున్నాయికదాని మార్కెట్ లో దొరికే చెక్క విగ్రహాలు, మట్టి విగ్రహాలు నిత్య పూజకి వినియోగించ కూడదు. చెక్క విగ్రహాలగురించి కిందటి పోస్టులో చెప్పుకున్నాము. మరి మట్టి విగ్రహాలని గణపతి నపరాత్రులలో, దసరాలలో పూజిస్తాంకదా మరి నిత్య పూజలో ఎందుకు పెట్టుకోకూడదు అంటారా మట్టి విగ్రహాలకు కూడా పగుళ్ళు వస్తాయి. మరి అలాంటివాటిని పూజించకూడదుకదా. గణపతి నవరాత్రులలో, దసరాలలో కేవలం ఆ నవరాత్రులలో పూజించి తర్వాత ఉద్వాసన చెప్పి నిమజ్జనం చేస్తారు. ఎక్కువకాలం పూజ చెయ్యరుకదా.

అలాగే ఉగ్ర స్వరూపం వున్న విగ్రహాలను, చాలా తేజస్సుతో, భయంకరంగా వున్న విగ్రహాలను పూజించకూడదు. పూజా సమయంలో మన దృష్టి దానిమీద వున్నప్పుడు మనకు ప్రశాంతత తగ్గే అవకాశం వున్నది. చిన్ముద్రతో, అభయ హస్తంతో ఆశీర్వదిస్తున్నట్లుండే విగ్రహాలను పూజిస్తే మనం నమస్కారం చేసి కళ్ళు తెరవగానే ఆ దేవుడు మనల్ని ఆశీర్వదిస్తున్నట్లు, మనవంక శాంతంగా, చిరునవ్వుతో చూస్తున్నట్లు వుంటే మనకి ఎనలేని ప్రశాంతత లభిస్తుంది..ఎక్కడలేని ధైర్యం వస్తుంది. అంతకన్నా మన పూజకి పరమార్ధం ఏముంటుంది?

(జీ తెలుగు ప్రసారంచేసిన గోపురం ఆధారంగా)

చెక్క విగ్రహాలు ఇంట్లో పూజలో పెట్టుకోవచ్చా

2011-03-10T18:21:00.002+05:30

చాలామంది ఏ యాత్రలకో, బజాలో వెళ్ళినప్పుడు అందమైన చెక్క విగ్రహాలు కనబడితే ఇష్టంగా కొనుక్కొచ్చుకుంటారు. ఆ చెక్క బొమ్మలు దేవుడివయితే కొందరు పూజలో కూడా పెట్టుకుంటారు. కానీ అది సరైన పని కాదు. మరి అర్క గణపతిని పూజిస్తారే..అదీ చెట్టునుంచి వచ్చిందేగా అంటారా? మీ పాయింటూ కరెక్టే. అయితే దుకాణాల్లో అమ్మేవన్నీ అర్క గణపతులు కాదు. అసలు అర్క గణపతి ఎలా వస్తుంతో తెలుసా? తెల్ల జిల్లేడు పెద్దగా అయిన తర్వాత, అంటే కనీసం 10 సంవత్సరాల తర్వాత చెట్టు వేళ్ళకి గణపతి ఆకృతి స్వయంసిధ్ధంగా ఏర్పడుతుంది. ఆ చెట్టు పూర్తిగా ఎండాక జాగ్రత్తగా ఆ గణపతి ఆకారాన్ని తీస్తారు. అర్క గణపతి ఆకృతి సంతరించుకోవటం మామూలు విషయం కాదు.

అలాంటి అర్క గణపతికి కూడా అభిషేకం చెయ్యకూడదు. కేవలం పుష్ప పూజ, సంప్రోక్షణ మాత్రమే చెయ్యాలి. భగవంతుడు ఎన్ని మహిమలు చూపించినా ఏ వస్తువుకుండే సహజసిధ్ధ గుణాలు ఆ వస్తువుకి వుంటాయి. చెట్టుకుండే గుణాలు చెట్టునుండి వచ్చిందికనుక అర్క గణపతికుంటాయి.

అలాగే ఇతర చెక్కలతో తయారుచేసిన విగ్రహాలుకూడా. స్వభావ సిధ్ధంగా చెక్కకి పగుళ్ళు రావచ్చు, విరిగి పోవచ్చు, చెదలు, పురుగులు పట్టచ్చు. అలాంటి విగ్రహాలకు పూజ చెయ్యంకదా. అందుకే చెక్క విగ్రహాలు నిత్య పూజలో పెట్టకూడదు.

(జీ తెలుగు ప్రసారం చేసిన గోపురం ఆధారంగా)

గుడికి వెళ్ళగానే, గుడినుంచి బయటకొచ్చాక కాళ్ళు కడుక్కోవాలా?

2011-02-24T17:08:00.001+05:30

ఆలయానికి వెళ్ళినప్పుడు సాధారణంగా అందరం కాళ్ళు కడుక్కుని ఆలయం లోపలకి వెళ్తాము. ఇది మంచి పధ్ధతే. మనం బయటనుంచి వచ్చాం కనుక దుమ్ము ధూళి కాళ్ళతో వచ్చే అవకాశం వున్నదిగనుక, కాళ్ళు, చేతులు కడుక్కుని పరిశుభ్రంగా ఆలయంలోకి వెళ్ళటం ఆలయ పరిశుభ్రానికీ, అక్కడికి వచ్చేవారి ఆరోగ్యానికీ మంచిది.

అయితే కొందరు శనీశ్వరుడికీ, నవగ్రహాలకీ ప్రదక్షిణ చేసినప్పుడు వెంటనే హడావిడిగా కాళ్ళు కడుక్కుంటారు. ప్రదక్షిణలు చేసి శని పీడ వదిలించుకొచ్చాము…ఒక్క క్షణం కాళ్ళు కడుక్కోవటం ఆలస్యం చేస్తే శని మళ్ళీ ఎక్కడ పట్టుకుంటాడోనని హడావిడిగా కాళ్ళు కడుక్కొస్తారు. కొందరయితే శనీశ్వరుణ్ణి సరిగ్గా చూడనుకూడా చూడరు. ఎక్కడ పట్టుకుంటాడోనని భయం. ప్రదక్షిణ చేసినందుకే శని పట్టుకుంటే పాపం ఆలయంలో వుండే పూజారి నిత్యం స్వామి విగ్రహాన్ని కడిగి, శుభ్రం చేసి, పూజలుచేసే పూజారికి మాట ఏమిటి శనీశ్వరుడిని పీడగా భావించకూడదు. శని ఈశ్వర స్వరూపం. మన పూర్వ జన్మ కర్మ బాగుండనప్పుడు, మనం చేసే తప్పులకు శిక్ష, శని దశ వచ్చినప్పుడు అనుభవించక తప్పదు. అంటే మనం చేసే తప్పులకు శిక్ష విధించేవాడు శని.

శనిని వదుల్చుకోవాలని చూసేవాళ్ళకి మన శరీరంలోనే శని వుంటాడని తెలుసా? మన తల వెంట్రుకలలో శని వుంటాడు. కనుబొమలకి శని కారకుడు. ఇవి లేకుండా మనిషికి అందం వుండదు. అంటే మనిషికి అందాన్నిచేవాడు శని. కంటిలో కార్నియాకు శని కారకుడు. శని వుంటాడు కార్నియా వద్దంటే మన కంటి చూపు శరీరంలో సన్నటి నరాలకు, ఇంతెందుకు మన ఆయుష్కారకుడు శని. అలాంటి శనీశ్వరుణ్ణి దర్శించిన తర్వాత ఏదో పీడని వదిలించుకోవాలన్నట్లు కాళ్ళు కడుక్కోవటం, దేవుణ్ణి చూడకుండా గబగబా ప్రదక్షిణలు చెయ్యటం సరైన పనేనా?

మనం ముడుచుకుని ఇంట్లో కూర్చున్నా మన కర్మ శేషాన్ని అనుభవించక తప్పదు. శనీశ్వరుడు నమస్కరించదగినవాడు. పూజించ దగిన వాడు. ఆయనకి భయపడటం, కాళ్ళు కడుక్కోవటం మూఢనమ్మకమే.

లలితా సహస్రనామం చేసిన తర్వాత అమ్మవారికి ఏమి నైవేద్యం పెట్టాలి?

2011-02-22T16:40:00.001+05:30

చాలామందికి ఈ సందేహం వుంది. కొందరు లలితా సహస్రనామ పారాయణ ప్రతి నిత్యం చేస్తుంటారు. కొందరు రెండు పూటలా చేస్తారు. కొందరు ప్రత్యేక దినాలలో…ఇలా రకరకాలుగా…ఈ మధ్య లలితా సహస్రనామ పారాయణ చేసేవారి సంఖ్య ఎక్కువైందనే చెప్పొచ్చు. వీరిలో కొందరికి మామూలుగా నిత్యం మహా నైవేద్యం పెట్టే అలవాటు వుంటుంది. ఇలాంటివారికి ఏ సమస్యాలేదు. కొందరికి ఇంట్లో మడిగాగానీ, నిష్టగాగానీ చెయ్యటం కుదరదు. ఒక్కొక్కళ్లకి ఒక్కో రకం ఇబ్బంది. ఇలాంటివారికి లలితా సహస్రనామం పారాయణ చేసినప్పుడు అనేక అనుమానాలు..మహా నైవేద్యం పెట్టలేక పోయామే..అసలు అమ్మవారికి ఏం నైవేద్యం పెట్టాలి..ఏదో ఇవాళ ఒక పండు పెట్టేశాను..సరిగ్గా చేశానో లేదో…ఇలా గుంజాటన పడతారు. అందరికీ మహా నైవేద్యం పెట్టటం అన్నివేళలా కుదరకపోవచ్చు. నిత్యం పారాయణ చేసేవారు తొందరగా అయ్యేది ఏదైనా చేసి పెట్టవచ్చు. అమ్మవారిని హరిద్రాన్నైక రసికా అని కీర్తిస్తాం. పెసర పప్పు వేసిన పులగం నైవేద్యం పెట్టవచ్చు. అదీ కుదరకపోతే కర్జూర పండు నైవేద్యం పెడితే మహా నైవేద్యం పెట్టినట్లేట. ఒక్కొక్కసారి అవి కూడా వీలు పడకపోవచ్చు..సమయానికి దొరకక, తెచ్చినవి అయిపోయి వగైరా ఏ కారణ వల్లనైనా. అప్పుడు వీలయితే ఆవుపాలలో, లేదా ఇంట్లో వుండే పాలల్లో తేనె కలిపి నైవేద్యం పెట్టవచ్చు. అందుబాటులో వున్న ఏ పండయినా నైవేద్యం పెట్టవచ్చు. అమ్మవారికి కావలసినది భక్తికానీ ఏమి పెట్టాము అన్నది కాదు. మనం నిండు మనసుతో భక్తిగా ఏదైనా సమర్పించవచ్చు.

కొన్ని ప్రత్యేక కార్యక్రమాలు వుంటాయి. చంద్ర దోష పరిహారార్ధం కొందరు పౌర్ణమినాడు చంద్రుని లలితా పరమేశ్వరి రూపంలో పూజించి, ఆరుబయట చంద్ర కిరణాలు పడే చోట పూజ చేసి పాలు, బెల్లంతో చేసిన పరవాణ్ణం నైవేద్యం పెట్టి అందరికీ పెట్టి వారు తింటారు. అలాగే నవరాత్రులలో అమ్మవారిని పూజించేవారు మినప గారెలు తప్పనిసరిగా నైవేద్యం పెడతారు. శుక్రవారం నియమంగా పారాయణ చేసేవారు అమ్మ గుడాన్నప్రీత మానస కనుక బెల్లం వేసిన పరనాణ్ణం నైవేద్యం పెడతారు.

నిత్యపారాయణకి వీలయితే ఏమైనా చెయ్యవచ్చు..వీలు కానప్పుడు భక్తిగా ఏది సమర్పించినా పరవాలేదు.

(జీ తెలుగు ప్రసారం చేసిన గోపురం ఆధారంగా)

మనలో మాట

ఈ సందర్భంలో మా నాన్నగారికీ నాకూమధ్య జరిగిన సంఘటన ఒకటిగుర్తొస్తోంది. మా నాన్నగారొకటేఅనేవారు. నువ్వు తినేది ఏదైనాదేవుడికి పెట్టవచ్చు. అయితే దేవుడికిపెట్టింది ఏదీ పారవెయ్యద్దు అనేవారు. అంటే కొబ్బరిగాయ కొడితే లోపలకొబ్బరి తీసి పెట్టాలి..మరి మనమాపెంకులు తినలేముకదా. ఒకసారి నేనుదానిమ్మ పండు పెట్టటం చూశారు. వలిచి పెట్టకపోయినావా అందులో అన్నిగింజలూ బాగా వుండకపోవచ్చుకదాఅన్నారు. మనమేం తక్కువతిన్నామా..నేను దేవుడికి ముందేచెప్పేశాను..నా హడావిడి సంగతి నీకుతెలుసుకదా..ఈ పండులో మంచిగింజలే తిను బాగాలేనివి వదిలెయ్యిస్వామీ అని..అదే అంటే మా నాన్నగారుఫక్కున నవ్వి మీ దేవుడేం దానిమ్మపండే పెట్టమని అడగలేదుకదా..ఏఅరటి పండో, పాలో పెట్టు, నీకువలవటానికి తక్కువ టైముపడుతుంది, ఒక్క నిముషంలో దాన్నితినేసికూడా వెళ్ళచ్చు అన్నారు. నిజమేగా!

స్నేహానికి ద్రోహం

2011-01-21T12:42:00.000+05:30

అవును ప్రియ మరణంవల్ల జరిగిన ద్రోహం స్నేహానికి. ప్రమదావనానికిగానీ దానిలోని సభ్యులకుగానీ కాదు. ఎందుకంటే ఆడపేరుతో వస్తే అమ్మాయి అని నమ్మాము. సరదాగా మాట్లాడాముగానీ, చెప్పకూడని సంగతులూ, ఇంట్లో రహస్యాలూ ప్రమదావనంలో ఎవరూ చర్చించుకోరు. ఎందుకంటే అందరికీ మంచీ చెడూ తెలుసు. ఇంతమంది ఆడపేర్లుపెట్టుకున్నవారితోనూ అంతా సరదాగా మాట్లాడారు, ఆత్మీయతని పంచుకున్నారు. అంతమాత్రాన నష్టమేమీలేదు. అయితే బాధంతా నమ్మించి స్నేహాన్ని మోసం చేశాడని, ఇంత ఆత్మీయంగావుండి ఇలా దగాచేశారని. చనిపోయిందని తెలిసినప్పుడు, మోసాన్ని పసిగట్టలేక, మనసున్న మనుషుల్లాగా బాధపడ్డాము. అది తప్పా? ఆ వార్త చెప్పటం జ్యోతి చేసిన పొరపాటెలాఅవుతుంది?. అనేక కారణాలవల్ల తనుకూడా ఈ మోసాన్ని గుర్తించివుండకపోవచ్చు. ఒక విధంగా తను రాంగ్ ఫోటో పెట్టటం మంచిదయింది. అసలు మోసం బయటపడింది.

ప్రమదావనంలో ఇంగింత జ్ఞానం లేనివారూ, ఒకళ్ళు ఆడించినట్లు ఆడేవారూ ఎవరూ లేరు. ఎవరు చెప్పినా చెప్పకపోయినా ఇంకముందు ఆడపేర్లు పెట్టుకునేవాళ్ళతో అందరూ జాగర్తపడతారు. ఇప్పుడూ కొన్ని జాగ్రత్తలు తీసుకున్నాము. అయితే ఈ జాగ్రత్తలనుకూడా అధిగమించి అతి తెలివితేటలుగలిగినవాళ్ళు చేసే మోసాలకు అప్పుడప్పుడూ ఇలా బలికాక తప్పదు. దీనితో మేము పోగొట్టుకున్నది మనుషులమీద నమ్మకాన్ని. దానివల్ల మాకు పెరిగేది ముందు జాగ్రత్త మాత్రమే.

నేను అర్ధం చేసుకోలేని విషయం గురించి అడుగుతున్నాను. దయచేసి తెలిసినవారు చెప్పండి. బ్లాగులు మన మనోభావాలు రాసుకోవటానికి. సరే. కానీ మన మనోభావాలు ఇంత ఛండాలమయిన భాషలో రాసుకోవాలా? ఇంత దిగజారిపోయి తిట్టుకోవాలా? మనం సంఘంలో బాధ్యతగల పౌరులంకాదా? యుక్తాయుక్త వివేచన లేకుండా మన అక్కసు తీర్చుకోవటానికి ఎవరో ఒకరిని తిట్టాలా? నిజంగా మనం మెచ్చని విషయం వుంటే మంచి భాషలో చెప్పి మన సంస్కారం చాటుకోలేమా???

చాలా చోట్ల కామెంట్లల్లో ప్రమదావనంలో ఆడోళ్ళకి పర్సనల్ విషయాలు మాట్లాడుకోవటం తప్పితే పనిలేదు అన్నట్లు రాశారు. ఆడవాళ్ళు మరీ అంత ఫూల్స్ కాదు ఇంటిగుట్టు రచ్చకెక్కించటానికి. శుభకార్యాలకి విషెస్ చెప్పుకున్నంతమాత్రాన పర్సనల్ విషయాలన్నీ చెప్పేసుకున్నట్లు కాదు. అది తప్పితే ప్రమదావనం కార్యక్రమం ఇంకేమీ లేదనుకోవటం పొరబాటు.

ఒకటి మాత్రం నిజం. ఒకరి కుటుంబ సభ్యులు పోయారంటే అందరూ ఒకటై వారిని ఓదార్చి తిరిగి మామూలు మనిషిని చెయ్యాలని ప్రయత్నంచెయ్యటం..అనారోగ్య సమయాల్లో మానసిక అండగా నిలవటం, కంప్యూటరుగానీ ఇంకా ఏమైనా తెలియని విషయాలు తెలుసుకోవటంకూడా ఆడవాళ్ళ ముచ్చట్లుగా తీసేస్తే అది ఆడవారిపట్ల మీకున్న చిన్నచూపు మాత్రమే. ప్రమదావనం గురించి కామెంటు చేసేవారు జ్యోతిమీద అక్కసుతోగాక దానిలో సభ్యులనెవరినన్నా అడిగి నిజానిజాలు తెలుసుకుని చెయ్యండి.

ఒకరు ఒక సబ్జెక్టు చెబితే దానిమీదే అంతా పోస్టులు రాస్తున్నారన్నారు. ఇదికూడా దూషించే విషయమేనా? ఇది ఏ విధంగా తప్పో చెప్పగలరా? ఒక సబ్జెక్టు మీద అనేకుల భావాలు, ఒకే సమయంలో వాటిని చెప్పే పధ్ధతి ఎలావుంటుందో విశ్లేషించవచ్చుకదా? నచ్చలేదనుకోండి. చదవటం మానెయ్యండి.

చివరిగా నా విజ్ఞప్తి ఒక్కటే. ఆడవాళ్ళని అలుసుగా చూడకండి. తేలికగా మాట్లాడకండి. మీ జీవితంలోనూ ఆడవారు వున్నారు. భావ వ్యక్తీకరణ స్వేఛ్ఛ మీకుంది. అయితే చదువూ సంస్కారాలు కలవారిగా భాషమీద కంట్రోల్ పెట్టుకోండి. మడి కట్టుకుని రాయక్కర్లేదు...కుళ్ళులో దొర్లకండి.

కదంబ మాలిక – 7 వ భాగం

2011-01-12T06:42:00.001+05:30

ప్రమదావనం సభ్యులు ప్రప్రధమంగా ఏర్చికూర్చుతున్న ఈ కదంబ మాలికలో ఏడవ మూర (సప్తమ భాగం) ఇది. వ్రాసిన వాళ్లలో ఎవరూ చెయ్యి తిరిగిన రచయిత్రులు లేరు కనుక (నిఝంగా నిజమండీ. ఒట్టు. ఎందుకంటే అందరి చేతులూ మామూలుగానే వున్నాయి), మా ఈ ప్రయత్నాన్ని ఆదరించి, సద్విమర్శలు చేసి ప్రోత్సహిస్తారని ఆశిస్తున్నాను.

ఈ మాలికలో ఆరవ భాగం శ్రీమతి రుక్మిణీదేవిగారు వ్రాశారు. కధ సాగటంకోసం ఒకసారి ఆ భాకం గుర్తు చేసుకుందామా?

*********************************************************************

ఇంక ఇప్పుడు నా కధనం చిత్తగించి సద్విమర్శలు అందించండి..........

“ఏంటి లక్ష్మమ్మా? నిన్న రాలేదు, ఇవాళ ఇంత ఆలస్యమా ఎందుకిట్లా చేస్తున్నావు?” అంటూ బయటకొచ్చిన సరోజిని, పెరట్లో మామిడి చెట్టుకి ఆనుకుని నిస్సత్తువగా కూలబడి వున్న లక్ష్మమ్మని చూసి కంగారు పడింది.

లక్ష్మమ్మకి 35 ఏళ్ళుంటాయి. స్కూల్లో చదువుకోలేదుకానీ, ఆ వయసుకే ప్రపంచాన్ని చాలానే చదివింది. తెలివితేటలుతోపాటు ధైర్యం కలది. చదువుకునివుంటే మంచి పొజిషన్ లో వుండేది. కానీ లక్ష్మమ్మ దురదృష్టం కలిమి పేరుకి మాత్రమే పరిమితమైంది. అందుకే చదువుకునే అవకాశం రాలేదు. మొగుడు తాగుబోతు. లక్ష్మమ్మకి దడిసి రోజూ తాగకపోయినా, పెళ్ళాంమాట ఎందుకు వినాలి అనే పురుషాహంకారం నెత్తికెక్కినప్పుడు మాత్రం పూర్తిగా తాగేసి వచ్చి లక్ష్మమ్మనీ, అడ్డొస్తే పిల్లల్నీ చావగొడతాడు. మర్నాడు వాళ్ళని చుట్టేసి రాత్రి వాళ్ళని కొట్టినందుకు తనని తనే తిట్టుకుంటూ వాపోతాడు.

ఇద్దరు ఆడపిల్లలు పుట్టగానే మొగుడికి తెలియకుండానే ఆపరేషన్ చేయించుకుని, అతని చేతిలో తన్నులు తిన్నది లక్ష్మమ్మ. అదేమిటే చెప్పి చేయించుకోకపోయినావా అని నారాయణమ్మగారంటే, ఆడికి చెబితే సేయించుకోనీడమ్మగారూ. నా బిడ్డల బతుకూ నా బతుకుమల్లే కాకుండా వుండాలంటే ఆళ్ళని చదించుకోవాల. ఇట్టా బిడ్డల్ని కంటూ పోతే ఆళ్ళని చదించడంకాదుగదా తిండికూడా ఎట్టలేం. అని తను చేసిన పనే సరైనదని నిర్ధారించుకుంది. మొగుడి తాగుడు మాన్పించటానికి నానా విధాలా ప్రయత్నిస్తూంటుంది.

అలాగే పిల్లల్ని చదివించటానికీ నానా అవస్తా పడుతుంది. ఫీజులు కట్టలేనప్పుడు పిల్లలు కొన్నాళ్ళు స్కూలుకెళ్ళకపోతే కలవరపడిపోతుంది. వాళ్ళదగ్గరా, వీళ్ళదగ్గరా అప్పుచేసి ఎలాగోలా ఫీజు కడుతుంది. ఈ అవస్తలు చూసే సరోజిని జాలిపడి కొంత సహాయం చేద్దామనుకుంది.

నారాయణమ్మగారొకసారంది వుండబట్టలేక. మీలో మారు మనువులున్నాయికదా. ఇన్నవస్ధలు పడేబదులు వీడ్ని వదిలేసి నీ దోవ నువ్వు చూసుకోవచ్చుకదా అని.

“ఏ రాయయితేనేమమ్మా పళ్ళూడగొట్టుకోటానికి. బిడ్డల్నిడిసి పోలేను కదమ్మా. అయినా వేరేవాడు సరిగ్గుంటాడని, నా బిడ్డల్ని సరిగ్గా చూసుకుంటాడనీ నమ్మకమేటమ్మా. ఎవురయినా మమ్మల్నందర్నీ కూకోబెట్టి కూడెట్టలేరుకదా. నా కట్టం నాకు తప్పదు. అయినా ఈడి మనసూ మంచిదేనమ్మా. నేనన్నా, పిల్లలన్నా పేణం. ఆ తాగుడే ముంచేత్తోంది.”

“ఈ గవర్నెమెంటోళ్ళేమో పేదోళ్ళకి ఇళ్ళివ్వలేరు, పని చూపించలేరుగానీ, ఇయ్యన్నీ మరిసిపోడానికి బాగా తాగండని ఏడబడితే ఆడ ఈ దుకాణాలు మాత్తరం తెరుత్తున్నారు. అసలు నన్నుగాని ఓ పాలి ఆ మినిట్టరుని చేత్తే ఈళ్ళందరి సంగతీ తేల్చిపారేత్తాను.”

ఆరోజు లక్ష్మమ్మ ఆలోచనలకీ, ఆవేశానికీ అబ్బురపడ్డారందరూ. ఏ చదువూ రానిదైనా, మనిషిని మనషిలా స్వీకరించాలనీ, ఏవో లోపాలున్నంతమాత్రాన ప్రేమాభిమానాలు కుంటుపడవనీ లక్ష్మమ్మ తన భాషలో ఎంత చక్కగా చెప్పింది అనుకున్నారు నారాయణమ్మ.

మధ్య తరగతి కుటుంబాల్లో సాధారణంగా ఒక మనిషి సంపాదిస్తే కుటుంబమంతా ఆ మనిషిమీద ఆధారపడుతుంది. కుటుంబంలో అవకాశంవున్నవాళ్ళు ఎవరికి తగ్గట్లు వాళ్ళు కుటుంబానికి చేయూతనివ్వాలనికూడా ఎంత చక్కగా అర్ధం చేసుకుంది లక్ష్మమ్మ అనుకుంది సరోజిని.

ప్రజల అవసరాలు పట్టించుకోని ప్రభుత్వాన్నికూడా వదలలేదు. అసలు ఇలాంటివాళ్ళు ఎదురు తిరిగి నిలేస్తే ప్రభుత్వాల గతేమిటని అనుకుంది అనిత.

అలాంటి లక్ష్మమ్మ అసలు ప్రాణమే లేనట్లుగా పెరట్లో మామిడి చెట్టుకానుకుని కూలబడివుంది. ముఖంలో కళ లేదు. ఒంటిమీద బట్ట వుందో లేదో ధ్యాస వున్నట్లు లేదు. చూపులు ఏ శూన్యాన్ని చూస్తున్నాయో తెలియటంలేదు. లక్ష్మమ్మని ఆ పరిస్ధితుల్లో చూసి ఆశ్చర్యమో, భయమో తెలియని గగుర్పాటుకి లోనయింది సరోజిని. అనాలోచితంగా లక్ష్మమ్మ దగ్గరకెళ్ళి భుజాలు పట్టి కుదుపుతూ, “లక్ష్మమ్మా, ఏమయింది ఎందుకలా వున్నావ్?” అని అడిగింది. ఓదార్పుగా లక్ష్మమ్మ తల, చెదరిన బట్టలు సవరించింది. నారాయణమ్మగారు తన మడిని మంటకలిపే ఈ పనులన్నీ చూస్తున్నా, ఆవిడలోని మానవత్వం లక్ష్మమ్మ పరిస్ధితి చూసి ఆందోళన చెందింది.

“ఏంటి లక్ష్మమ్మా ఏమయింది” అంటూ కంగారుగా ఆవిడకూడ లక్ష్మమ్మ దగ్గరకొచ్చేసింది. వాళ్ళ వెనకాలే ఇంట్లో వాళ్ళూ, సుభద్రా. లక్ష్మమ్మ పరిస్ధితి చూసి అనిత వెళ్ళి గ్లాసుతో మంచినీళ్ళు తెచ్చిచ్చింది. లక్ష్మమ్మ వాటిని తాగకుండా తోసేస్తుంటే సరోజిని, అనిత కొంచెం నీళ్ళు బలవంతాన తాగించారు.

నీళ్ళు తాగేసరికి లక్ష్మమ్మ లోపలున్న ఆవేదనంతా ఉబకి ఉబికి ఏడుపు రూపంలో తన్నుకొచ్చింది. వెక్కిళ్ళ మధ్య చెప్పింది... “జానక్కన్నాయం జరిగిపోనాది తల్లీ. దాని బతుకు బుగ్గయి పోవాల్సిందేనమ్మా ఆ పోరగాళ్ళు రాకపోతే. ఇట్టా అయిందేటమ్మా నేనేంసేతును నేనేమయిపోవాల”.....ఏడుస్తూనే వున్నది.

“ఏం జరిగింది లక్ష్మమ్మా? కొంచెం అర్ధమయ్యేటట్లు చెప్పు” సరోజిని నెమ్మదిగాసముదాయిస్తున్నట్లు అడిగితే లక్ష్మమ్మ వెక్కెక్కి ఏడుస్తూనే చెప్పింది. “జానకిని ఎవురో ఇద్దరు పోరగాళ్ళు లాక్కెళ్ళారంటమ్మా. నిన్న పొద్దున్న మీ ఇంటికని వచ్చింది. దోవలో ఆళ్ళెవరో సూసి ఆటోలో లాక్కుపోయారంట. ఆ చివుర ఇళ్ళు కడుతూ ఆపేశారుకదా ఆడకి తీసుకెళ్ళి పాడు చెయ్యబోతుంటో ఇది బయపడి అరిచిందంట. ఆటోలో పోతూకూడా ఇది అరుస్తూ, చెయ్యూపుతూనే వుందట. కాలేజి పోరగాళ్ళు టూషన్ కెళ్తా సూసారంట. ఆళ్ళు లగెత్తి ఆళ్ళని బెదరగొట్టి పారదోలారంట. దీనికి దెబ్బలు తగిలి, ఆగోరానికి సుహ తప్పి పడిపోతే ఆస్పత్రికి తీసుకెళ్ళారంట. తెలివొచ్చాక మాకు కబురెడితే ఎల్లాం.”

ఆ మాటలు వినగానే దిగ్భ్రాంతి చెందారు అంతా. అమ్మో...లేచిన వేళ బాగుంది! ఎంత ఘోరం తప్పింది!! అంత చిన్నపిల్ల....పట్టుమని పదేళ్ళన్నా వుంటాయో వుండవో... ఎప్పుడన్నా లక్ష్మమ్మ రాలేక పనికి పంపిస్తే తమ ఇంట్లే పని చేయించుకోవటానికే బాధపడతారు. అంత చిన్న పిల్ల. ఎవరికి ఎలా ప్రాణం ఒప్పింది. అసలు మనుషులేనా వాళ్ళు...తలా ఒక మాట.

“బాధ పడకు లక్ష్మమ్మా, జానకెలా వుంది దానికేం కాలేదుకదా ఎక్కడుంది ఇప్పుడు ఒక్కదాన్నీ వదిలేసి వచ్చావా?” మళ్ళీ తలా ఒక ప్రశ్నా వేశారు.

“ఆసుపత్రిలోనే వుందమ్మా. మా ఆయన్ని కూసోపెట్టొచ్చా. పిల్లకే గోరం జరగలేదు. కానీ బాగా బయపడ్డది. బెంబేలెత్తిపోతున్నది. మాకు కాల్సెయ్యాడటంలా. దేవుళ్ళల్లా ఆ కాలేజీ టూడెంట్లొచ్చి కాపాడారు. లేకపోతే పిల్లేమయిపోయుండేదో. నా పిల్ల నాకు దక్కేదికాదు దేవుడో....”

“మరి ఆ స్టూడెంట్స్ వాళ్ళని పట్టుకోలేదా అట్లాంటి వాళ్ళని వూరికే వదలకూడదు.” అనిత ఆవేశం లక్ష్మమ్మ బాధలో వుందని కూడా చూడకుండా ఆరా తీసింది.

“లేదమ్మా. ఈళ్ళయిదారుగురుండి ఒక్కురుకున ఎల్లేసరికి ఆళ్ళు లగెత్తారంట. ఈళ్ళేంచెయ్యలేక పిల్లనాసుపత్రిలో చేర్చాలని తీసుకొచ్చారంట. ఒక్కడు దొరికినా ఆడి పేనాలు తీసుండేదాన్ని. సచ్చినోళ్ళు. ఆడపిల్లలతో ఆడుకుంటారా. ఆళ్ళిళ్ళల్లో ఆడోళ్ళుండరా. ఆళ్ళ అక్క సెల్లెల్కిలా అయితే. అప్పుడు తెలస్తాది మా బాద. కాలేజీ టూడెంట్లు అల్లరి సేత్తారనుకుంటాంకానీ, సూడండమ్మా, ఆళ్ళే మా జానకిని కాపాడారు. దైర్నం సెప్పి ఆసుపత్రికి తీసుకెళ్ళి వైద్దెం సేయించారు. ఏ తల్లులు కన్న బిడ్డలో ఆళ్ళని సల్లటేల తల్సుకోవాల.” కళ్ళు తుడుచుకుంది.

“అసలు ఎవురన్నా ఆపదలోవుంటే ఆళ్ళనాదుకోటానికి ఇలా నలుగురొక్కసారెల్తే ఎవరైనా ఏం సెయ్యగలరమ్మా. ఎవరికోల్లు మాకెందుకులే అనుకుంటే ఈ గోరాలిట్టాగే సాగుతాయి. ఆళ్ళు నలుగురెళ్ళారు కనుక జానకి బతికి బయటపడ్డది. లేపోతే బిడ్డేమయిపోయుండేది.”

నిజమే. ఆ రోజు ఆ రౌడీ ఉత్తేజ్ వాళ్ళు అడ్డుకున్నప్పుడు లక్ష్మమ్మ తెలిసో తెలియకో దూరంనుంచే తనని పలకరించి ఆ సమయంలో తన ఆపద తప్పించిన సంగతి గుర్తొచ్చింది అనితకి. అప్పుడు లక్ష్మమ్మ పరకరించకపోతే ఇంకెంత గోల చేసేవాళ్ళో ఆ వెధవలు.

“అమ్మా నేనోపాలి మీకు సెప్పి ఎల్దామనొచ్చా. ఇంకపోతా. కొంచెం డబ్బుకూడా కావాలమ్మా ఓ రెండు రోజులు పనికి రాను.” లక్ష్మమ్మ లేవబోయింది.

“పద లక్ష్మమ్మా నేనూ వస్తాను. డాక్టరుగారితో ఒకసారి మాట్లాడి వస్తాను. హాస్పటల్ బిల్లు కూడా మేము కడతాంలే. నువ్వేం కంగారు పడకు.” తనూ బయల్దేరారు శ్రీరాంగారు.

“మీది శానా గొప్ప మనసయ్యా. దండాలు బాబయ్యా.” అంత కష్టంలోనూ కృతజ్ఞతలు తెలపటం మర్చిపోలేదు లక్ష్మమ్మ.

“అయ్యా, నేనోమాట సెబుతా పనిమడిసి సెప్పేదేటని తోసెయ్యకండేం.” ఒక్క క్షణం శ్రీరాంగారిని చూసి మళ్ళీ అన్నది లక్ష్మమ్మ. “అనితమ్మగారి ఇషయం కూడా ఆల్ల కాలేజీ టూడెంట్లకి సెబితే ఆల్లంతా కలిసి ఆ రౌడీల బరతం పట్టరా. ఇట్టాంటిషయాల్లో ఏమన్నా చేత్తే టూడెంటు కుర్రాళ్ళే సెయ్యాల. ఇంటో అయితే బిడ్డలిషయం మనం జాగర్త తీసుకుంటాం. మరి కాలేజీలో అక్కడున్న టీచర్లూ, ఇంకా మిగతా పిల్లలూ సూసుకోవాలగదయ్యా. “ మామూలుగా అయితే శ్రీరాంగారున్న గదిలోకి కూడారాని లక్ష్మమ్మ ఆ సమయంలో ప్రపంచంలో అన్యాయాన్ని అంతంచేయటానికి తపించే అపర కాళిలా వుంది.

“వాళ్ళూ చిన్న పిల్లలు. వాళ్ళల్లోనూ అనేక రకాలుంటారు. ఎవరో కొంతమంది ముందుకు రావచ్చు కానీ, చదువుకునే పిల్లలమీద బాధ్యతలు పెట్టకూడదమ్మా.”

“ఇదే పెద్ద బాద్యతయ్యా. ఎవురన్నా అల్లరి చేస్తావుంటే కాత్త బెదరగొట్టటం అంతేగందా. అదీ కాలేజీ చుట్టుపక్కల. ఇంటో మీరే చూసుకుంటారుగదా.”

“సరే దాని సంగతి తర్వాత ఆలోచిద్దాంలే. ముందు పద. జానకిని చూద్దాం. అయినా ఇలాంటి చిన్న చిన్న విషయాలు గోల చేసుకోకూడదమ్మా. అనిత పెళ్ళికావాల్సిన పిల్ల. నలుగురినోళ్ళల్లో పడితే మంచిదికాదు.” ఇంక లక్ష్మమ్మకు మాట్లాడే అవకాశం ఇవ్వకుండా బయటకు నడిచారు శ్రీరాం గారు.

“ఏంటో ఈ సదూకున్నోళ్ళు” బుఱ్ఱ గోక్కుంటూ వెనకే బయల్దేరింది లక్ష్మమ్మ.

మరి తరువాత భాగం కోసం వచ్చే బుధవారందాకా ఆగక తప్పదు మరి.
8వభాగం శ్రీమతి లక్ష్మీరాఘవగారు పోస్టు చేశారు చూడండి.

సంక్రాంతి సమయంలో నువ్వుల వాయనం తీసుకోవచ్చా?

2011-01-09T07:42:00.002+05:30

జ్యోతిష్య శాస్త్ర ప్రకారం పౌర్ణమి రోజున పుష్యమీ నక్షత్రం వున్న మాసాన్ని పుష్యమాసమంటారు. ఇది శని నక్షత్రం. శని ఆయుఃకారకుడు. ఈ కాలంలో నువ్వులు తినమంటారు. ఎందుకు? సకల రోగాలను పోగొట్టే శక్తి తిలలకున్నది. ఇది హేమంత ఋతువు. ఈ ఋతువులో చలి ఎక్కువ వుంటుంది. శరీరంలో శీతం ఎక్కువ. ఒళ్ళు నొప్పులు, కఫం, జలుబు, దగ్గు, వగైరా చలి వలన వచ్చే రోగాలు కూడా ఎక్కువే. శరీరంలో తగ్గిన ఉష్ణోగ్రత తిరిగి రావాలంటే నువ్వులను తినాలి. రోగాన్ని తీసేసి, శరీరంలో ఉష్ణాన్ని పెంచే శక్తి నువ్వులకున్నది.

శాస్త్ర ప్రకారం ఈ మాసంలో నువ్వుల పిండిని ఒంటికి రాసుకుని స్నానం చెయ్యాలి. దానివలన శరీరంలో రక్త ప్రసరణ సరిగ్గా జరుగుతుంది. నువ్వులని తినాలి, వాయనమివ్వాలి, దానం చెయ్యాలి, తర్పణాలు వదలాలి.

కొంతమందికి ఈ సంక్రాంతి సమయంలో నువ్వుల వుండలు, నువ్వుల జీడీలు, నెగుళ్ళు అని నువ్వులు, పంచదార వగైరా కలిపి అందరికీ పంచుతారు. నువ్వులు, తీపి తిని నువ్వు నూరేళ్ళు జీవించమని, తీపి తిని తియ్యగా మాట్లాడమని, సంతోషంగా ఆరోగ్యంగా వుండమనీ బంధు మిత్రులకి శుభాకాంక్షలు తెలియజేస్తారు. తెల్లనువ్వులు లక్ష్మీప్రదమైనవి. సంక్రాంతి సమయంలో వీటిలో లక్ష్మి నివసిస్తుందంటారు. వీటిని ఎవరైనా పంచిపెడితే తీసుకోవటంలో తప్పులేదు. కేవలం నల్ల నువ్వులు శని సంకేతాలు. నల్ల నువ్వులు తీసుకోకూడదు.

(జీ తెలుగు ప్రసారం చేసిన గోపురం ఆధారంగా)